FESTA DOS MUNDOS presenta

«SUSEIA et ULTREIA. Todos os pobos, linguas e tribos»

A partir de xaneiro do 2023 · Principais cidades galegas

Ponte entre a celebración do Xacobeo 21·22 e o próximo ano Santo, a Festa dos Mundos volve este 2023 co ciclo «SUSEIA et ULTREIA. Todos os pobos, linguas e tribos», incluíndo varios concertos repartidos entre as principais cidades galegas. Artistas de renome internacional, procedentes dalgúns dos países de orixe maioritaria das persoas que chegan camiñando a Compostela, actuarán neste ciclo a modo de agradecemento. 

Patrocinado polo Xacobeo, coa colaboración dos concellos participantes, esta Festa dos Mundos mantén o espírito de anteriores edicións que busca celebrar a diversidade, tender pontes entre culturas e propiciar escenarios abertos ao diálogo a través da música. Ucraína, país en guerra por causa da invasión rusa, terá cabida neste ciclo como mostra de solidariedade e apoio á súa poboación.