Kevin Johansen + Liniers: o fin de xira chega a Galicia en maio

Lugo, Pontevedra e A Coruña serán as cidades escollidas para este espectáculo único que une música e debuxo ao vivo

Imaxe do cartel dos concertos de Kevin Johansen e Liniers en Galicia

Kevin Johansen e Liniers regresan a Galiza para o tramo final da súa xira europea. Despois de percorrer medio mundo e realizar máis de 100 concertos desde 2023, o dúo despídese —ata novo aviso— cun espectáculo que mestura música, debuxo ao vivo e humor intelixente.

Mentres Kevin Johansen fai un percorrido polas cancións máis emblemáticas da súa discografía, o debuxante Liniers recrea un universo visual en tempo real sobre unha pantalla proxectada no escenario. Arte, música e amizade mestúranse nun concerto que envolve ao público nunha experiencia sensorial única.

Esta xira recolle tamén o lanzamento do seu álbum en directo “Desde que te Madrid” (2025) e a publicación do libro “Es nuestra forma de comunicarnos”, materiais que reflicten o espírito desta unión artística que suma xa máis de 16 anos de complicidade.