O festival Maré contará coa cantautora Bia Ferreira| Nordesía COM

A cantautora brasileira formará parte da selección de artistas internacionais programados para o festival que se desenvolverá en Santiago entre o 20 e o 24 de setembro.
O Rabelo, unhe des creadores trans galegos máis destacados, abrirá a actuación cun concerto previo.
Ata o 31 de xullo o festival oferta un abono para asistir á totalidade das actuacións por só 50 euros.

Santiago de Compostela, 14 de xullo de 2023. O festival Maré, que terá lugar do 20 ao 24 de setembro en Santiago de Compostela, contará coa actuación da brasileira Bia Ferreira. A cantautora está a presentar o seu novo disco «Faminta» e con este concerto porá fin á súa xira europea. Ela describe a súa música como MMP (Música de Mulher Preta, ou, en galego, Música de Muller Negra) e trata temas dende o feminismo ao antirracismo, pasando pola homofobia e as vivencias queer. A brasileira estase a converter nunha das referentes da escena independente contemporánea.

Xunto con ela, o Maré contará coa actuación previa d’O Rabelo, un des creadores da escena queer en Galicia máis destacades da actualidade. Na súa música mestura o tradicional con rap e ritmos de reguetón. En 2022 estreou o seu álbum «Suor», con potentes letras sobre o amor, os coidados e as súas vivencias como persoa queer. Agora está a traballar no seu segundo álbum «Silva».

As entradas individuais para a actuación de Bia Ferreira e O Rabelo xa están dispoñibles e poden ser adquiridas na plataforma entertiket.com por 20 euros máis gastos de xestión. Porén, a oferta musical do Maré para este setembro de 2023 é moito máis ampla. Ata o 31 de xullo poderase adquirir un abono para asistir á totalidade das actuacións musicais, coloquios e moitas outras actividades que ofertará o festival entre o 20 e o 24 de setembro. Entre elas, a de Havana D’Primera, un dos grandes grupos cubanos do momento, que pechará o festival na Sala Capitol o 24 de setembro.

Bia Ferreira é unha das apostas fortes do Maré este ano polas súas potentes letras e a súa mestura dos ritmos R&B, jazz e reagge. A cantante, compositora, produtora musical e «artivista», como ela mesma se define, comezou os seus estudos musicais con tan só 3 anos. O seu traballo «Cota Não É Esmola» foi un dos seus primeiros éxitos. Versa sobre a situación das mulleres no Brasil e o sistema de cotas de acceso á universidade no país lusófono.

Bia Ferreira en concierto — Bia Ferreira no festival Millo Verde (Redondela).

En Spotify acumula máis de 78.000 escoitas mensuais, máis de 13 millóns de visitas en Youtuve e un longo historial de activismo no seu país. A súa experiencia vital e a súa forza discursiva convertérona nunha referente das loitas do movemento antirracista, feminista e queer no mundo.

En 2019 lanzou o seu álbum «Igreja Lesbiteriana: Um Chamado», a modo de manifesto do seu propósito de vida: nunca calar fronte á opresión. Este disco fala de feminismo, antirracismo, de privilexios, afeito e amor dende unha perspectiva combativa e a través dunha mestura de ritmos R&B, soul, reagge, jazz e blues. A finais do 2022 estreou «Faminta», o seu novo disco, no que recupera estes ritmos e volve a letras reivindicativas. É tanto que así o son que foron descritas como “escrivivência”, un termo que emprega Conceição Evaristo para aquelas persoas que “contan as nosas historias dende as nosas perspectivas”.

Dentro da diversa programación que ofertará o festival Maré en setembro na capital galega, tanto Bia Ferreira como O Rabelo son dúas apostas fortes no eido musical. Neste especial concerto entrarán en contacto as novas reformulacións da música tradicional cos ritmos brasileiros, todo acompañado dun trasfondo reivindicativo.