A brasileira Renata Rosa pasa máis tempo ultimamente en Europa que no seu país de orixe. Máis de cincuenta concertos ao longo deste ano 2005 xustifican a sua presencia no noso continente. Significativos son o éxito e a repercusión no mercado francés, cuio público ten contribuído especialmente a convertila na sorpresa da música brasileira.

No seu traballo discográfico Zunido da Mata, a artista fusiona as tradicións do nordeste do Brasil ate obter un resultado abraiante de percusión, voces e danzas. Renata Rosa propón unha viaxe a través do mundo de Caboclos, os indios nativos e os africanos de Brasil. Nacida en Sao Paulo, compón a súa música inspirándose no Maracatu rural, o Côco e o Cavalo Marinho, entre outros ritmos. Xa desde a adolescencia entaría en contacto coas pequenas vilas que se atopan no nacemento do Rio Sao Francisco, no estado de Pernambuco. Alí descubre o côco, canción de preguntas e respostas ou o toré, un tipo de polifonía inspitada nos indios.

A voz de Renata Rosa comezou a perfilarse como un potente instrumento e o estudio do canto feminino tornouse na súa paixón. O seu entusiasmo non abrangué só as músicas do Brasil, senón outras músicas do mundo, como a árabe ou a hindú. A enerxía que desprende o seu canto, é unha consecuencia da danza e da forza dos instrumentos de percusión combinados cos artistas. En todas as súas cancións acompáñase dunha "rabeca" (violin tradicional brasileiro que ela mesma toca), o cavaco, a bandola, percusións e baixo.

O sabor de África está presente na música desta muller, que non parou de dar concertos nos últimos tres anos. Está claro que Renata Rosa é unha artista no camiño de conquistar grandes audiencias sen distinción de orixes e nacionalidades como amosa o seu éxito europeo.