De Galicia a Maputo, pasando por Cracovia e Lisboa. NARF, o proxecto do polifacético músico Fran Pérez rompe as barreiras e convírtese nunha das aventuras musicais máis interesantes na última década en Galicia. A batidora deste músico consegue pratos con sabores diversos: rock, pop, ritmos africanos, melodías con arrecendo a poesía galegos-portuguesa, etc. Trátase NARF da nova identidade para un músico inquedo, que investiga no ritmo e na harmonía. Para un inventor de formar de compoñer. Para un cancionista, como el se define.

A finais dos oitenta formaba parte de Nicho Varullo e Kinindiolas, grupos de rock que levaban as súas cancións estomacais polos locais de Santiago de Compostela. A necesidade de buscar espazos propios conduciuno xunto a un grupo de persoas comprometidas coa música e o teatro a formar parte da compañía Chévere, cuxas montaxes distinguíronse polas bandas sonoras orixinais compostas por Fran Pérez. Máis tarde abrirían a NASA, espacio artístico xa imprescindible en Galicia, e chegarían éxitos como o obtido coa opereta Annus Horribilis, considerado o mellor espectáculo musical pola crítica de Barcelona.

Ao longo dos anos fóronse estreitando os vencellos deste músico con Portugal e, por extensión, con África. A través da súa participación no Festival Tom de Festa da localidade portuguesa de Tondela, entrou en contacto co sector cultural neste país actuando habitualmente nos seus escenarios. Neste momento a aventura africana do músico está nun punto de máximo interese. Recén chegado de Maputo (Moçambique), onde prepara xunto ao grupo Timbila Muzimba un espectáculo conxunto para o vindeiro 2006, NARF prepara un novo proxecto musical tras Directo en Compostela, editado en 2004. O single Quero ser tambor, un tema impactante no que o autor musica un poema do escritor mozambicano, Jose Craveirinha, será o seu adianto neste Nadal.