Tcheka triunfa en Europa co seu retrato musical da vida cotiá das illas de Cabo Verde, de onde procede. Despois dun primeiro album, Argui! (2003), no que xa amosaba unha nova forma de interpretar o batuque,o seu segundo traballo, Nu Monda - o título significa "retirar as herbas dañinas"-, afonda no camiño iniciado traspasando á guitarra os ritmos tradicionais que habitualmente se obteñen das percusións. Abrangue outros xéneros como a "tabanka", un rtimos de Carnaval, ou o talulu, tema tocado no dia de Todos os Santos na illa de Foho.

Este guitarrista e cantor naceu en 1973 no Porto da Ribeira da Barca, na caboverdiana illa de Santiago. Recibiu as influencias e o ensino do seu pai, un popular violinista chamado Nhô Raul Andrade. Aos 15 anos comezou a desenvolver un estilo persoal baseado no batuque, que el quer convertir nun ritmo universal. Traballou como cámara para a televisión e xunto ao xornalista Júlio Rodrigues formou un duo que tocaba nos bares da capital caboverdiana.

Agora, con dous discos no mercado, e unha morea de actuacións, a música de Tcheka soa en Europa e atopa un oco en mercados como o frances e o italiano. A música africana está de noraboa ao contar entre os seus embaixadores con este xoven músico de estilo persoal.