NARF

Voltar ó punto de partida. Iso é o que fai Fran Pérez con NARF, proxecto no que sintetiza casi vinte anos de aventuras musicais.

A finais dos 80 formaba parte de Nicho Varullo e Kinindiola, grupos de rock que levaban as súas cancións estomacais polos locais de Santiago de Compostela. Máis tarde, a súa actitude inqueda levouno a crear bandas sonoras para teatro, pezas infantís, para filmes de animación, abrir e xestionar a NASA (espacio artístico imprescindible en Galicia), participar en Annus Horribilis (opereta considerada o mellor espectáculo musical pola crítica de Barcelona), actuacións na Expo de Lisboa e Hannover, meses de creación en Portugal coa Compañía Trigo Limpo… Pasos para chegar ata NARF.

Con este proxecto quere reducir o espacio entre el e o público. Alixeirar a equipaxe de instrumentos. Chegar á pel. Acompáñano soamente Marcos Teira como segundo guitarra e Pepe Sendón na percusión e vibráfono. Para este amante de Bela Bartok, os Beatles e o rock de guitarras de finais dos 90, o reto está agora en seducir ao público coas súas harmonías aguzadas, inflexións urbanas e melodías espidas.

Cancións que son dardos sen punta, poemas contemporáneos que deixan doce sabor de boca, pezas lúdicas para combatir os demos deste século XXI sen agresividade. Cancións que fan posible viaxar a lugares descoñecidos.