Convertir o multiusos do Sar nun escenario único para ritmos e artistas de todo o planeta é o obxectivo do FesTribal 04. Transformar o espazo nun territorio imaxinado que nos conduza por diferentes xeografías e, ao mesmo tempo, nun enorme salón de baile do século XXI. Coa inspiración no concepto de rave, -unha festa para os ouvidos pero tamén para o resto dos sentidos-, xurde a proposta de FesTribal.
O FesTribal 04 é un punto de encontro entre propostas musicais de diferentes procedencias. Tamén é un punto de confluencia para públicos diversos, interesados na musica que racha fronteiras xeográficas e que promove a creacion dun bo ambiente. Trátase, en definitiva, dunha aposta por propostas anovadoras e rupturistas. Os artistas que encaixan nesta festa dos ritmos globais teñen en comun ter desafiado o canon musical para lanzarse sen medos á mestura. Descubrindo novos sons ou traendo ao novo século ritmos étnicos (orientais, africanos, etc), e incorporando á tecnoloxía ao seu traballo artístico. Amosando co que mellor saben facer, a sua música, que a mestura exerce un grande poder de atracción sobre o público. Que todos e todas xa estamos mesturados.