FESTIVAL ETNOSUR
O artista Xosé Manuel Budiño viaxa a Alcalá la Real (Jaén) para presentar no festival Etnosur o venres 16 de xullo o seu terceiro disco Zume de Terra. O público deste festival multidisciplinar que naceu no ano 1997 poderá comprobar ao vivo como X.M Budiño de novo volta a sorprender, non só sen medo a innovar senón co convencimento de que é a saida para fuxir dos sons repetitivos dos nosos días. X.M Budiño non pretende recriar a tradición musical galega, senón crear novos conceptos musicais a partir dela.

O artista asumiu integramente neste terceiro disco en solitario o traballo de composición, arranxos musicais, producción e gravación. Entre os ingredientes que X.M Budiño manexou para este Zume de Terra inclúense, na teima de loitar contra a desmemoria, samplers coas gravacións realizadas por Alan Lomax en Galicia nos anos cincuenta, a colección "Raiceiras" dirixida por Mercedes Peón, a voz de Castelao dirixindose aos galegos de Montevideo en 1941 ou documentos sonoros sobre a marea negra do Prestige.

Cos doce temas orixinais que conforman o disco Xosé Manuel Budiño próbase a sí mesmo e confirma ao público a súa capacidade para participar en todo o proceso de elaboración deste Zume de Terra. En Jaen subirán ao escenario con el como artistas convidadas Carmen Rey e o grupo Anubía e, en palabras do artista, os asistentes serán testemuñas "dun directo explosivo con moitas voces" cociñado con instrumentos tradicionais e tecnoloxía electrónica.

Zume de Terra é un novo concepto no contexto da música en Galicia. Para este disco, X.M Budiño contou con importantes colaboradores de diferentes xeografías como son o músico bretón Jacky Molard, os escoceses Capercaillie e Michael McGoldrick, o músico e productor Júlio Pereira, as voces de Sara Tavares (Cabo Verde) e a brasileira Lilian Vieira (Zuco 103). Todos eles conformaron un zume que, en palabras do actor e director teatral Carlos Blanco, é "suave, sedoso, elegante e frugal en ocasións. Rítmico e bailable como poucos. Unha romaría na néboa. Unha paisaxe. Inesquecible".

ZUMES DA TERRA, ESPECTáCULO DE SABORES
En Foz (Lugo) o domingo 18 de xullo Xosé Manuel budiño presenta, dentro da programación do Xacobeo 2004, o espectaculo Zumes da Terra. Será emitido pola 2 de TVE e conducido polo actor, director e showman Carlos Blanco. Trátase pois dunha variante do seu último disco que recolle a expresión acuñada por Castelao na sua alocución aos galegos da Montevideo hai máis de 60 anos, pero coa vixencia plena do seu significado, que non é outro que a diversidade como mestura de ingredientes, sabores e cores do mundo.

E iso é o que levará a cabo Budiño nesta posta en escena singular que pretende homenaxear aos artistas galegos que constrúen día a día apostas culturais arriscadas por todo o mundo e, a súa vez, aos artistas doutras latitudes que tenden pontes entre culturas. Concretamente Zumes da Terra establece un microuniverso cuios vértices poderían ser as Terras altas de Escocia e as terras austrais de Angola. Do que da de si o espazo comprendido entre ambos puntos da boa conta a nómina de artistas que estarán en Foz xunto a Budiño o 18 de xullo.

Donald Shaw é o fundador da mítica banda Capercaillie, protagonista dun dos fenómenos da "nova música celta no mundo" desde Escocia. Renovador da musica tradicional escocesa, ten exercido xa de productor de X.M Budiño no seu anterior disco Arredor. Pola súa parte, Michael McGoldrick, tamén membro de Capercaillie, está considerado un dos mellores frautistas do momento.

Alberto Mvundi chega a Europa procedente de Angola a mediados dos noventa e as letras das súas cancións lembran a situación que sufre o seu país natal.

Dezi Donelly está considerado un dos máis importantes violinistas da música celta actual, revelándose xa aos doce anos como campeón deste instrumento en Irlanda.

Ed Boy chega desde Inglaterra co seu estilo proprio á guitarra e un curriculum no que destacan os seus traballos con Sharon Shannon ou Michael McGoldrick.

Xa dentro de Galicia, X.M Budiño arroupará o seu espectaculo coas voces de Carmen Rey, vocalista de jazz, e o grupo Anubía, tres mulleres que apostan pola forza da voz e da pandeireta. Carlos Castro está considerado un dos mellores percusionistas de Galicia e forma parte do grupo Fía na Roca. Por ultimo, desde Cabo Verde, ainda que xa galegas despois do tempo que levan vivindo en Burela, o espectáculo de X.M Budiño conta con Batuko Tabanka e o poder das súas voces e percusións orixinarias do sur.

[+ info sobre o seu novo disco ZUME DE TERRA]
[+ info Festival Etnosur]